Конкурсра – арçын ачасем

        Пăлапуç Пашьел вăтам шкулĕнчи 5 класра 10 ача вĕренет. Вĕсенчен улттăшĕ арçын ача. Çĕр-шыв Хÿтĕлевçисен кунне халалласа класс ертÿçи Светлана Никитина вĕсем валли «Айтăр-ха, арçын ачасем!» конкурс йĕркелерĕ. 4 хĕрача тÿре пуканне йышăнчĕ.

       «Арпашнă сас паллисем» ятпа иртрĕ пĕрремĕш ăмăрту.  Арпаштарнă сас паллисене вырăнне лартса çар званийĕсене çырчĕç пулас салтаксем. Кунта чи маттурри Валерий Журавлев пулчĕ, вăл пур сăмаха та тĕрĕс тупнă. Тепĕр конкурс та кăсăклă пулчĕ. Сĕтел çине хунă çирĕме яхăн япалана 1-2 минут сăнанă хыççăн çав вăхăт хушшинчех пăхмасăр  мĕн астуса юлнине çырасси те шăл çемми çеç пулчĕ. Кунта вара Данила Журавлева çитекенни пулмарĕ. Василий Спринсян, Алексей Кидановпа Николай Соколов та çурри ытла астуса юлнă. Арçынна пĕлтерекен  тăванлăх  ячĕсене  çырассипе вара Саша Сапожников пурне те кая хăварчĕ.

        Ăс-тăна çивĕчлетмелли конкурссемпе çеç çырлахмарĕç пиллĕкмĕшсем, хул-çурăма тĕреклетмелли вăйăсене те хутшăнчĕç. Кашниех хутран чăмăртанă «мечĕке» пуринчен те инçерех ывăтма тăрăшрĕ. Валерий Журавлев кунта та малтисен шутĕнче пулчĕ, ун хыççăн Саша Сапожников та юлмарĕ. Пулас пограничниксем валли ирттернĕ «Тимĕр шапа» конкурс чи кăсăкли те хавасли пулчĕ. Хутран касса кăларнă ура йĕрĕсем тăрăх палăртнă вырăна чи  кайран çитекенни çĕнтермеллеччĕ,  ачасем вара конкурс ятне тимлемесĕр чи малтан çитме талпăнчĕç. Ку конкурсра Алеша Киданов палăрчĕ.

         Пур конкурс пĕтĕмлетĕвĕ тăрăх вара пĕрремĕш вырăна Данила Журавлев йышăнчĕ, иккĕмĕшĕнче – Николай Соколов,  виççĕмĕш вырăна Валерий Журавлев тухрĕ. Юлашкинчен пурте пĕрле пылак парнепе сăйланчĕç.